Estimadas familias,
Queremos darvos a benvida a este novo curso 2018-19 que acabamos de estrear. Algunhas xa veteranas no centro e outras inaugurando esta nova etapa da secundaria, pero todas, sen dúbida, con ganas de ver medrar ás súas fillas e fillos...en tódolos sentidos.
Como familias, somos unha parte moi importante da comunidade educativa do IES Miraflores, e como ANPA, podemos canalizar as nosas suxestións e achegas ao proxecto educativo do centro a través do equipo directivo así como participando no consello escolar. Por iso é importante a vosa inscrición na asociación, a vosa asistencia e participación na Asemblea ordinaria de principio de curso (que en breve informaremos de data e hora), así como realizar calquera consulta ou suxestións ao longo do curso ao noso enderezo electrónico: apamiraflores@gmail.com.
E queremos aproveitar esta primeira entrada no blog e ser canle de información duns obradoiros de “Disciplina Positiva” que van organizarse dende Servizos Sociais do Concello de Oleiros nestes meses. Tiveron moi boa acollida en edicións pasadas. Deixamos a información que nos chegou onde poderedes ler un breve resumo así como lugar e forma de inscrición. Esperamos sexan do voso interese:
"As inscricións serán a través da web municipal www.oleiros.org, na sede electrónica, no apartado cidadáns e empresas, en trámites on line, a partir das 10:00 h do luns 24 de setembro e ata o xoves 27 de setembro ás 23:00 h.
As prazas adxudicaranse por orde de inscrición. O número de prazas por obradoiro é de 20 persoas.
Cada un dos obradoiro terá unha duración de 16 horas, en 8 sesións de 2 horas cada unha. Serán en horario de tarde, ao longo do mes de outubro e desenvolveranse na Casa de Cultura de Perillo os seguintes días:
- Obradoiro 1 (familias con menores de 0-6 anos de idade): luns e mércores, 1, 3, 8, 10, 15, 17, 22 e 24 de outubro.
- Obradoiro 2 (familias con menores de 7-12 anos de idade): martes e xoves, 2, 4, 9, 11, 16, 18, 23 e 25 de outubro.
Estes obradoiros están baseados nos principios da Disciplina Positiva, que desterran os métodos de condicionamento da conduta (castigos e premios) e dan as claves para ensinar ás nenas e aos nenos a desenvolver as súas propias habilidades en base ás súas decisións, guiadas/os sempre pola supervisión da persoa adulta. Trátase de que pensen por si mesmos e axudalos a ir construíndo o seu propio criterio, favorecendo a convivencia e creando un clima agradable e de confianza na familia.
A metodoloxía proposta para estes obradoiros é vivencial, participativa e divertida, con dinámicas nas que aprender sexa algo divertido e constructivo, e nos que, sesión tras sesión, as familias poidan recoñecer os avances acadados coa aplicación dos coñecementos adquiridos.
Estes obradoiros queren contribuir e apoiar ás familias na crianza e educación dos seus fillos e fillas, contribuindo a un correcto desenvolvemento emocional, dotándoas de ferramentas e habilidades para esa importante tarefa."
Saudos agarimosos,
Xunta directiva
desigualdade de xénero.
